Konferenca e Parë Ndërkombëtare “Dimensionet Shpirtërore në Shkencat Humane”.

 

Në ceremoninë e hapjes së konferencës ishin të pranishëm personalitete të rëndësishëm të jetës publike në Shqipëri. Ndër të ftuarit speciale që përshëndetën punimet e konferencës ishte edhe znj.Jozefina Topalli, Kryetare e Parlamentit të Shqipërisë,  Kryetari i Komunitetit Mysliman të Shqipërisë, H. Selim Muça, Kryepeshkopi i Kishës Autoqefale Shqiptare Anastas Janullatos dhe Imzot Rrok Mirdita Arqipeshkëv Metropolit Tiranë-Durrës.

Në fjalën e tij përshëndetëse, Dekani i Fakultetit të Shkencave Humane në Universitetin Hëna e Plotë BEDËR, njëkohësisht edhe kryetari i konferencës, Prof. Dr. Ajhan Tekinesh , pasi  falënderoi të pranishmit për pjesëmarrjen në këtë konferencë të parë të këtij lloji, u ndal në rëndësinë e dimensionit shpirtëror në shkencat humane. 

 

Ai theksoi se “Njeriu, ka për ta arritur unitetin në brendësinë e tij vetëm kur të vërë në punë aftësitë shpirtërore dhe të dëgjojë zërin e zemrës e të shpirtit të tij. Është e pamundur të eliminojmë dualizmin e të perceptuarit të botës së jashtme pa arritur unitetin brenda nesh. Sepse njeriu botën e jashtme dhe të tjerët, i vështron nga dritarja e tij e brendshme. Njeriu i zemëruar e sheh çdo gjë të veshur me këtë ndjejë. Po ashtu, edhe njeriu, i cili është kapur fort pas perceptimeve të pesë shqisave dhe që intelektin e ndjesitë e tij të jashtme i ka pranuar si kritere të vetëm të të vërtetës e ka shumë të vështirë të dallojë anën shpirtërore të jetës dhe gjithësisë. Shpresoj që trajtimi i njeriut së bashku me ndjenjat, mendimet, moralin dhe ndërgjegjen, ka për ta shtuar ndikimin e shkencave humane mbi njeriun dhe shoqërinë. Si rezultat ka për të shtuar edhe reputacionin e këtyre shkencave të vyera”.

 

Ndërkohë gjatë fjalës së tij të mbajtur para të pranishmëve,  Rektori i Universitetit Hëna e Plotë BEDËR, Dr. Ferdinand Gjana theksoi rëndësinë që ka çlirimi i jetës shkencore dhe intelektuale nga dogmatizmi modern. Dr. Gjana u ndal gjithashtu edhe në nevojën që ka shoqëria e sotme për të bashkuar anën shpirtërore dhe atë shkencore.

 

“Kjo konferencë e ideuar dhe e realizuar nga Fakulteti i Shkencave Humane të Universitetit Hëna e Plotë- BEDËR, u  iniciues e shpalosjes dhe ballafaqimit të ideve shumë të diskutuara dhe të debatuara, në të shkuarën, të sotmen dhe të ardhmen e shoqërisë sonë.  Gjithsecili me atë çka do të sjellë në këtë konferencë  do të  kontribuojë dhe do të ndikojë në dhënien e disa sugjerimeve për zgjidhjen dhe qartësimin e shumë çështjeve në lidhje me rolin e dimensionit shpirtëror” theksoi ai.

 

Nga ana tjetër, Kryetari i Komunitetit Mysliman të Shqipërisë H. Selim Muça , Kryepeshkopi Anastas Janullatos dhe Imzot Rrok Mirdita, vunë theksin në rëndësinë që ka këndvështrimi shpirtëror në shkencë  i cili vjen si vlerë e besimit dhe fesë për shoqëritë e kohëve të sotme. Ata vunë theksin në rolin e komuniteteve fetare dhe ndikimin që kanë në zhvillimin e një shoqërie më të ekuilibruar mes besimit dhe shkencës. 

 

Më pas fjalën e ka marrë , Kryetarja e Parlamentit të Shqipërisë , Znj. Jozefina Topalli e cila përshëndeti  pjesëmarrësit në konferencë dhe falenderoi organizatorët për një konferencë kaq të rëndësishme. Ajo nënvizoi  rolin që kanë komunitet fetare në jetën shpirtërorë të qytetarëve si dhe u ndal në traditën  e bashkëjetesës fetare në Shqipëri si një vlerë të madhe të kombit shqiptar.  “ Ne si komb kemi një vlerë shumë të madhe siç është bashkëjetesa dhe toleranca  midis komuniteteve fetare. Kjo është një vlerë e jashtëzakonshme dhe për këtë duhet të jemi krenarë. Shqiptarët janë i vetmi komb në Europë  që mbrojtën hebrenjtë gjatë luftës së dytë botërore nga  gjenocidi nazist dhe kjo tregon shumë për dimensionin shpirtëror të tyre” u shpreh Znj. Topalli.

 

Konferenca do të përfshijë në diskutim akademikë dhe ekspertë nga fushat e edukimit, antropologjisë, shkencave sociale, drejtësisë, medias dhe komunikimit, sociologjisë, psikologjisë, teologjisë dhe fushave  të tjera të lidhura me shkencat humane të cilët do të referojnë në sesionet e datës 12 dhe 13 maj, të cilat do të vijojnë në ambientet e Universitetit Hëna e Plotë BEDËR.