Studentët e ekselencës, takim me drejtuesit e universitetit

 

Një grup studentësh të ekselencës zhvilluan sot një takim me drejtuesit e universitetit. Në takim ishin të pranishëm rektori i Universitetit “Hëna e Plotë” (Bedër), Dr. Ferdinand Gjana, zëvendësrektori dhe dekani i Fakultetit të Shkencave Humane, Prof. Dr. Ayhan Tekineş, dekani i Fakultetit të Filologjisë dhe Edukimit, Dr. Ahmet Ecirli.

Rektori i universitetit, Dr. Ferdinand Gjana i përgëzoi studentët për rezultatet e larta që kanë arritur dhe vlerësoi rolin e tyre si model jo vetëm për studentët e tjerë, por edhe për brezat e rinj që do të studiojnë në këtë institucion të arsimit të lartë. “ Fillimisht dua t’ju përshëndes dhe t’ju uroj për suksesin e arritur. Ky është më tepër universiteti juaj, sepse ndryshe nga stafi, ju do të mbani gjithë jetën me vete diplomën e marrë nga ky universitet. Jeni duke kaluar vitet më të rëndësishme të jetës suaj në këto auditorë dhe diplomimi nga ky universitet do të jetë kartëvizita juaj në jetën profesionale.”

Ai u ndal gjithashtu edhe në zhvillimet më të fundit, në lidhje me universitetin duke njohur studentët me arritjet e deritanishme. Ndërkohë  dekanët e fakulteteve vlerësuan studentët jo vetëm për rezultatet e arritura por edhe për faktin se ata janë  brezi i parë i studentëve dhe si të tillë do të kenë një vend të veçantë në historinë e këtij institucioni. Më pas Dr. Gjana u shprehu edhe një herë studentëve mbështetjen e universitetit jo vetëm gjatë viteve të studimit, por edhe pas diplomimit, gjatë karrierës së tyre profesionale .