“Bedër” finalizon marrëveshjen me Fondacionin
Kolegji Universitar Bedër finalizoi sot Marrëveshjen e Bashkëpunimit (MoU) me Fondacionin "Globethics.net", me qendër në Gjenevë (Zvicër), fokusuar tek Etika në Arsimin e Lartë. Ky bashkëpunim do të konkretizohet me një sërë aktivitetesh akademike të përbashkëta, si: konferenca, leksione te hapura, workshope, etj.
Gjithashtu, palët do të kenë akses në module lëndësh mbi etikën në fusha të ndryshme akademike, mundësi publikimi në revista shkencore, si dhe trajnime rreth etikës në profesion për mësuesit, pedagogët dhe profesionistët.
Ecuria e ekonomisë shqiptare për periudhën 2015-2020
Departamenti i Ekonomisë dhe Biznesit në Kolegjin Universitar Bedër zhvilloi sot Workshop-in me temë: “Ecuria e ekonomisë shqiptare për periudhën 2015-2020”.
Workshop-i u hap nga Dr. Ndriçim Ciroka, përgjegjës i Departamentit të Ekonomisë dhe Biznesit, i cili bëri një tablo rreth ecurisë së ekonomisë për këtë periudhë. Duke qenë aktiviteti i parë i kësaj njësie të sapokrijuar në KU Bedër, Prof. Asoc. Dr. Tidita Abdurrahmani, Dekane e Fakultetit të Teknologjisë dhe Biznesit, përshëndeti të pranishmit dhe i uroi suksese anëtarëve të departamentit në organizimet e tjera që kanë planifikuar të zhvillojnë për këtë vit akademik.
Panelistja tjetër, Dr. Irina Canco, lektore dhe ish-specialiste në Ministrinë e Financave në sektorin e buxhetit, u ndal tek efekti i pandemisë në buxhetin e shtetit, borxhi publik, perspektiva e ekonomisë, etj. Z. Uran Derri, specialist ekonomie dhe finance, sipërmarrës dhe ekspert kontabël, foli për ekonominë shqiptare, duke bërë krahasimin e saj me vendet e rajonit për periudhën 2015-2020.
Takimi vijoi me pyetje-përgjigje mes panelistëve rreth ecurisë dhe perspektivës së ekonomisë shqiptare në të ardhmen, borxhit publik, investimeve, etj.
“Dritarja e mundësive” – Nisma më e fundit e studentëve master
“Dritarja e mundësive” është një platformë digjitale e krijuar për t'i ardhur në ndihmë të rinjve, të cilët janë në kërkim të një mundësie praktike, zhvillimi profesional apo punësimi. Gjithashtu, t’i informojë të interesuarit në lidhje me tregun e punës, mundësi praktikash profesionale e ofertash punësimi, mundësi për zhvillim individual nëpërmjet kurseve, seminareve e konferencave në fusha të ndryshme, të rejat më të fundit në drejtim të zhvillimit të profesioneve, intervista me njerëz të suksesshëm, etj.
Kjo nismë ndërmerret nga studentët e programeve master të Departamentit të Shkencave të Komunikimit në Kolegjin Universitar Bedër, në kuadër të lëndës Konceptim dhe Menaxhim Fushatash, nën udhëheqjen e pedagoges Edlira Mali.
Nëse jeni një biznes/institucion që dëshironi të ofroni mundësi dhe të njiheni me platformën, apo një i ri që dëshiron të mësojë se si kjo platformë mund t'ju vijë në ndihmë për të gjetur mundësinë tuaj, ju ftojmë të merrni pjesë, duke kryer regjistrimin tuaj në linkun: https://bit.ly/3iSwIl5
Ju mirëpresim!
“Takim mes Brezash - Ata që dinë të bëjnë fushata”
Departamenti i Shkencave të Komunikimit në bashkëpunim me Zyrën e të Diplomuarve në Kolegjin Universitar Bedër zhvilluan aktivitetin “Takim mes Brezash - Ata që dinë të bëjnë fushata”.
Në këtë takim të organizuar nëpërmjet platformës “Google Meet” ishin të ftuar studentët e diplomuar në programet master, në profilet Gazetari dhe Marrëdhënie Publike, të cilët janë integruar shumë mirë në tregun e punës, në mediat dhe agjencitë e marketingut më të mëdha në vend, si dhe jashtë vendit tonë, si SHBA, Zvicër, Itali, etj.
Takimi u zhvillua në kuadër të lëndës “Konceptim dhe menaxhim fushatash”, e cila zhvillohet në studimet e nivelit master. Gjatë këtij takimi, të diplomuarit treguan eksperiencat e tyre në këtë lëndë kur ishin studentë. Ata ndanë me njëri-tjetrin emocionet e përjetuara në secilën fushatë të ndërmarrë në kuadër të kësaj lënde, si dhe folën për rëndësinë dhe vlerën e saj kur përballesh me tregun.
Gjatë bisedave ndërmjet tyre, studentët ranë dakord që secila fushatë fillon në kuadër të një lënde dhe më tej shndërrohet në një sfidë e emocion dhe merr përmasa kombëtare.
Përgjatë takimit u diskutuan fushatat:
"Libri është i vetmi Kopsht që Mbillet për të Tjerët";
“Një fije floku për më shumë buzëqeshje”;
“Unë refuzoj të hesht. Bëje dhe ti, voto!”;
“Një shtëpi, një mburojë për trashëgiminë kulturore”;
“Një libër më shumë për Preshevën”;
“Ruaj Traditën, Festo Shqip!”;
“Njih tokën tënde, vizito Shqipërinë!”
Si dhe për fushatën e këtij viti, e cila po fillon.
Kujtojmë që këto fushata të zhvilluara kanë marrë përmasa kombëtare dhe kanë bërë bashkë personalitetet më të mëdha të kulturës, artit, muzikës, politikës, për të arritur qëllimet e fushatave për evidentimin dhe ruajtjen e vlerave morale dhe kombëtare.
Konkursi Ndërkombëtar Philip C. Jessup International Laë Moot Court Competition, nën administrimin e ILSA-s, bashkon studentët e së Drejtës Ndërkombëtare nga i gjithë globi. Jessup është konkursi ndërkombëtar më i madh në botë për studentët e drejtësisë, me pjesëmarrës nga më shumë se 800 universitete në mbarë botën.
Studentët e Drejtësisë nga Kolegji Universitar Bedër do të përfaqësojnë Shqipërinë në këtë edicion, i cili do të zhvillohet online mes datave 15 Mars - 18 Prill. Grupi përbëhet nga Razije Hela, Elvis Lika, Inisa Sota, Erkan Hasanaj dhe Aisha Morina. Ndërkohë trajnerët e tyre janë Daniel Klingenberg dhe Dr. Gentjan Skara.
Këto ditë ekipi i “Bedër” po zhvillon përballje miqësore me ekipe nga vende të ndryshme. Gjatë përballjeve që po u paraprijnë garimit final, studentët parashtrojnë argumentet e tyre lidhur me ceshtje dhe kauza që u caktohen trupi gjykues, prej të cilit marrin vlerësime dhe sugjerime.
Kolegji Universitar Bedër, në kuadër të planifikimit të karrierës, përgjatë gjithë muajit mars organizon ditët e informimit të maturantëve. Këtë vit organizimi zhvillohet online nëpërmjet platformës ZOOM.
Maturantët kanë mundësinë të ndjekin prezantimet e pedagogëve tanë lidhur me programet e studimit dhe mundësitë që ofron Kolegji Universitar Bedër. Prezantimet janë çdo ditë, nga e hëna në të premte, në dy orare të ndryshme:
13:00-14:00 15:00-16:00.
Për t’u pjesë e këshillimit të karrierës, në ditët dhe oraret e caktuara klikoni linkun:
https://bit.ly/389Pb8A
Meeting ID: 928 4815 9828 Passcode: 123456
Për më shumë informacion kontaktoni: admissions@beder.edu.al 067 34 27 001.
Ju mirëpresim!
Departamenti i Shkencave Kompjuterike në Kolegjin Universitar Bedër zhvilloi sot një leksion të hapur me temë: “A mund të bëhem një inxhinier software?” E ftuar për të referuar në këtë leksion ishte znj. Denalda Bishani, e punësuar si Java Software Developer në kompaninë gjermane Lufthansa Industry Solutions.
Ajo foli rreth mundësive që ofron kjo fushë dhe rrugëtimin profesional që duhet të ndjekin studentët deri në nivelin inxhinier software. I zhvilluar nëpërmjet platformës “Google Meet”, leksioni u shoqërua me pyetje dhe diskutime nga studentët dhe anëtarët e tjerë të stafit, lidhur me mundësitë dhe alternativat që ofron tregu shqiptar.
Departamenti i Shkencave Kompjuterike pranë Kolegjit Universitar Bedër, në kuadër të aktiviteteve jashtëkurrikulare të planifikuara për vitin akademik 2020-2021, organizoi Leksionin e Hapur me temë: “Rrugëtimi i një Zhvilluesi/Programuesi në Web, 2021”.
Në këtë Leksion të Hapur u trajtuan tema si:
Çfarë është programimi?
Bazat e Internetit?
Web Programing kundrejt Web Design.
Frontend kundrejt Backend
Version Control Systems
Mjetet dhe njohuritë kryesore të nevojshme për të formuar një karrierë si programues Frontend ose Backend.
Në përfundim të prezantimit pjesëmarrësit paraqitën pyetjet dhe përvojat e tyre në lidhje me këtë fushë.
Ky leksion u organizua nga MSc. Edlir Spaho, ndërsa i ftuari i këtij leksioni ishte MSc. Kristjan Pashollari.