Zhvillohet Simpoziumi i V-të Akademik Ndërfetar,
Më datë 14 dhjetor 2017, u zhvillua simpoziumi i pestë ndërfetar në fushën akademike midis përfaqësuesve universitarë të tri shkollave teologjike, të tre komuniteteve fetare në Shqipëri, Departamenti i Shkencave Islame në Kolegjin Universitar “Bedër”, Instituti Teologjik Katolik në Seminarin Ndërdioqezian “Zonja e Këshillit të Mirë”, Shkodër dhe Akademia Teologjike Ortodokse “Ngjallja e Krishtit”, Shën Vlash, Durrës, të cilët ishin edhe mikpritësit e simpoziumit të radhës. Delegacionet respektive u pritën fillimisht nga Dekani i Akademisë Teologjike Ortodokse, Hirësi Nikolla, stafi pedagogjik dhe studentë të kësaj akademie.
Më pas filloi punimet simpoziumi, i moderuar nga Hirësi Nikolla, ku referuan përfaqësues të tre institucioneve të larta arsimore. Në emër të Departamentit të Shkencave Islame, Bedër referoi rreth kësaj teme PhD. Cand. Hysni Skura, i cili foli rreth “Dashurisë Hyjnore në Islam”. Ndër të tjera ai u shpreh se: “Dashuria Hyjnore përfaqëson dëshirën dhe përkujdesjen e pakufishme të Krijuesit për krijesat e veta. Duke e parë dashurinë edhe si ndjenjë më të fuqishme universale njerëzore, dashuria në Islam shprehet me anë të dhembshurisë dhe mëshirës. Të shumta janë shenjat e dashurisë së Zotit për njeriun, si Krijimi i njeriut si mëkëmbës në tokë, krijimi në formë të përsosur dhe vlerësimi i njeriut mbi krijesat e tjera”. Referatin e tij z. Skura e mbylli me leximin e një lutjeje, ku theksoi edhe njëherë varësinë e njeriut nga Zoti, duke kërkuar prej Tij të mbushë zemrat e njerëzve plot me dashuri për Të dhe për njeri-tjetrin.
Referuesi i dytë ishte Dom Lorenzo Rosseti, meshtar dhe pedagog në Seminarin Ndërdioqezian, i cili prezantoi pikëpamjen romano-katolike rreth dashurisë. Ai theksoi se: “Perëndia në Dhiatën e Vjetër, përmes dërgimit të Urdhërimeve shpreh dashurinë e Tij për njeriun, se Ai kërkon sigurinë e tij. Urdhërimet sipas tij na drejtojnë drejt dy boshteve të dashurisë, atij vertikal drejt Dashurisë për Perëndinë dhe padyshim atij horizontal, të dashurisë për të afërmin.” Referati i tretë u mbajt nga z. Dhimitër Qosja, pedagog i Akademisë Teologjike Ortodokse, i cili theksoi se: “Dashuria është shoqëruesja e të gjitha veprimeve të Perëndisë në botë, të shprehura përmes Krijimit, jo nga nevoja, por nga liria, pikërisht dashuria e vërtetë është ajo që vjen nga liria. Zoti është dashuri, i cili e shpalos këtë pa rezervë.”
Në përfundim të tre referimeve pati diskutime dhe pyetje ndaj referuesve, ku pedagogë dhe studentë të tre palëve shprehen mendimet dhe komentet e tyre rreth temës së Dashurisë Hyjnore. Në këtë simpozium morën pjesë dhe Prof. Asoc. Dr. Rahim Ombashi, dekan i Fakultetit të Shkencave Humane, Dr. Genti Kruja, Përgjegjës i Departamentit të Shkencave Islame, Bedër, z. Dorian Demetja, Drejtor i Kulturës dhe Dialogut Ndërfetar në KMSH, të cilët edhe morën fjalën dhe diskutuan gjatë seancës së diskutimeve, si dhe gjithashtu morën pjesë pedagogë dhe studentë të Shkencave Islame, Bedër.
Zhvillohet programi artistik "Lajmëtari i fundit i së fshehtës"
Departamenti i Shkencave Islame në bashkëpunim me klubet studentore: “Oaze Shprese”, “Mesazhi i Jetës” dhe “Klubi i Muzikës”, organizuan një aktivitet në kujtim të lindjes së Profetit Muhammed a.s. Programi artistik ‘’Lajmëtari i fundit i së fshehtës’’ paraqiti një sërë pikash artistike, si lexim Kurani, këngë, poezi, pjesë teatrale etj.
Aktiviteti u hap me leximin e një pjese të Kuranit nga studenti i Shkencave Islame Fatijon Shemshedini. Më pas Msc. Hekuran Uzuni, pedagog pranë Departamentit të Shkencave Islame, në fjalën e tij përshëndetëse u shpreh se: “Dija është një nga trashëgimitë më të vlefshme që na kanë lënë profetët, dhe ne si kërkues të asaj dije duhet t’i japim hakun.”
Nën moderimin e studentëve Sefer Vrana dhe Enxhi Hasmeta programi vazhdoi me interpretimin e disa ilahive, poezive e pjesëve teatrale nga studentët e Shkencave Islame që pasqyronin kohën kur ka jetuar Profeti Muhamed a.s dhe përcollën disa mesazhe të vyera për të pranishmit.
I ftuar në program ishte edhe nënkryetari i Komunitetit Mysliman z. Laurel Luli, i cili falenderoi organizatorët dhe të pranishmit. Në fjalën e tij përshëndetëse ai u shpreh se: “Do të ishte mirë që jehona e zërit të profetit Muhammed a.s të vazhdojë akoma më tepër, të ngrihet lart, të zbukurohet, e të jetë më e pranishme në jetën tonë në të kundërt do të ishte një humbje më e madhe.” Ai theksoi faktin që aktivitete të tilla duhet të jenë më të shpeshta sepse në të tilla aktivitete ne bëjmë të mundur që të rikujtojmë rëndësinë e njohjes së profetëve.
Ndërsa dekani i Fakultetit të Shkencave Humane Prof. Dr. Asoc Rahim Ombashi duke falenderuar organizatorët për realizimin e këtij programi, theksoi se gëzime të tilla na bëjnë të ndihemi më të plotësuar shpirtërisht.
Në këtë aktivitet merrnin pjesë Dekani i Studentëve z. Kasim Ilhan, Përgjegjësi i Departamentit të Shkencave Islame Dr. Genti Kruja, drejtues të departamenteve të tjera si, Dr. Erlis Çela e Dr. Isa Erbas, si dhe pedagogë e studentë të shumtë nga KU Bedër.
Programi u mbyll me një interpretim të disa pjesëve të Mevludit nga Msc. Veton Tulla dhe studenti Abdullah Ziba.
Pas aktivitetit studentët e Departamenitit të Shkencave Islame organizuan një panair ushqimesh, të ardhurat nga shitja e të cilave do të shkojnë në ndihmë të familjeve të prekura nga përmbytjet.
Zhvillohet simpoziumi “Liria e besimit, e drejtë universale”
Me rastin e 27 vjetorit të zhvillimit të ceremonisë së parë Islame në vigjilje së rënies së sistemit komunist në vendin tonë, Departamenti i Shkencave Islame, organizoi një aktivitet kushtuar kësaj dite të rëndësishme historike.
Data 16 nëntor e vitit 1990, shënon një ngjarje me rëndësi të veçantë për të gjithë besimtarët shqiptarë, si rihapja e xhamisë së parë pas shumë vitesh privimi nga liria e besimit. Në këtë ditë H. Hafiz Sabri Koçi mbajti dhe fjalimin e parë në faljen e xhumasë, para mijëra të pranishmëve, duke u kthyer në një datë historike për mbarë shqiptarët.
Ky aktivitet përbëhej nga simpoziumi me temë, “Liria e besimit, e drejtë universale”, ku referuan studentë të Departamentit të Shkencave Islame, si dhe nga shfaqja e dokumentarit “H. Hafiz Sabri Koçi, pishtar i lirisë së besimit”.
Aktiviteti i moderuar nga studentja e Shkencave Islame, Zerina Kupe u hap me këndim Kur’ani nga studenti Abdullah Ziba. Më pas përshëndeti Dekani i Fakultetit të Shkencave Humane Prof. Asoc. Dr. Rahim Ombashi, i cili tha se kjo është një ditë feste për të gjithë besimtarët myslimanë, sepse falë asaj dite u hap porta drejt besimit.
I pranishëm në aktivitetin e organizuar ishte edhe nënkryetari i KMSH-së z. Lauren Luli, i cili gjatë fjalës së tij përshëndetëse theksoi se, falë kontributit të H. Hafiz Sabri Koçit në këtë ditë, u hapën dyert e shpirtit, dyert e gëzimit, që njerëzve t’u kthehej liria e besimit.
Pas tyre kumtesat e simpoziumit u mbajtën nga studentët e Shkencave Islame, Sonila Habili dhe Haki Sahitaj, të cilët referuan në lidhje me jetën dhe veprën e H. Hafiz Sabri Koçit dhe konceptet rreth lirisë së besimit. Në përfundim të aktivitetit Dr. Genti Kruja, Përgjegjës i Departamentit të Shkencave Islame dhe Msc. Veton Tulla, lektor në këtë departament, shpërndanë certifikatat e pjesëmarrjes për referuesit e këtij simpoziumi.
Në këtë aktivitet ishin të pranishëm nënkryetari i KMSH-së H. Lauren Luli, dekani i Fakultetit të Shkencave Humane Prof. Asoc. Dr. Rahim Ombashi, lektorë dhe studentë të Departamentit të Shkencave Islame, Bedër.
Të miturit në objektivin e medias
Departamenti i Shkencave të Komunikimit pranë Kolegjit Universitar Bedër në bashkëpunim me Autoritetin e Mediave Audiovizive dhe Albanian Center for Public Communication zhvilluan ditën e djeshme workshop-in me temë: "Të miturit në objektivin e medias". Për të diskutuar në panel ishin të ftuar Drejtori i Drejtorisë së Programeve në AMA (Autoriteti i Mediave Audiovizive) z. Arben Muka, korrespondentja e AFP-së (Agence France-Presse) në Shqipëri, znj. Briseida Mema, Korrespondenti i “The Associated Press” z. Llazan Semini, Kryetari i Unionit të Gazetarëve, z. Aleksandër Çipa, Koordinatori për Marrëdhënie me Publikun dhe Median në Fondin e Ballkanit Perëndimor, z. Alban Tartari, si dhe pedagogu e shkrimtari i njohur z. Agron Tufa. Gjatë workshop-it, nën moderimin e përgjegjësit të Shkencave të Komunikimit Dr. Erlis Çela, u diskutua mbi situatën aktuale në media të trajtimit të figurës së të miturve dhe programacionin që i dedikohet kësaj moshe. Zv. Dekani në Fakultetin e Shkencave Humane të Kolegjit Universitar Bedër, Dr. Ramadan Çipuri dhe z.Alban Tartari ndanë me studentët e masterit në Kolegjin Universitar Bedër eksperiencat dhe rezultatet gjatë punimit të këtij projekti në workshop-et e organizuara në disa nga qytetet e vendit tonë me gazetarët e mediave lokale. Gjithashtu u diskutua edhe në lidhje me ligjet aktuale dhe rolin e organizatave për trajnimin dhe vendosjen e rregullatorëve për mediat në lidhje me pasqyrimin e figurës së fëmijëve dhe standardet etike në televizion dhe media të tjera. Ky takim ishte dhe finalizim i projektit mbi “Etikën e raportimit rreth të miturve” të zhvilluar në disa qytete të Shqipërisë. Në përfundim të workshop-it studentët e masterit në Kolegjin Universitar Bedër ndanë edhe mendimet e tyre në lidhje me temën.
Kolegji Universitar "Bedër" uron Gëzuar festat e fundvitit!
Asambleja e Personelit Akademik organizoi sot mbledhjen e parë për vitin akademik 2017-2018.
Nën drejtimin e rektorit të Kolegjit Univesitar “Bedër” Prof. Dr. Ferdinand Gjana, mbledhja u zhvillua me praninë e të gjithë stafit akademik.
Pikat kryesore të diskutimit ishin gëzimi i lirisë së plotë akademike në drejtim të mësimdhënies, punës kërkimore-shkencore, kontributit institucional dhe kontributit profesional. Pjesëmarrja në aktivitete të ndryshme shkencore brenda dhe jashtë vendit në funksion të promovimit të titullit/gradës shkencore, në interes dhe në emër të institucionit. Organizimi i trajnimeve në funksion të kualifikimeve në institucionet akademike e kërkimore shkencore.
Kolegji Universitar Bedër organizoi një takim me studentët e komunikimit dhe drejtësisë, të mirëpritur nga rektori i K.U. Bedër Prof. Dr. Ferdinand Gjana, pedagogë si dhe një pjesë e stafit administrativ.
Gjatë këtij takimi studentët e masterit u njohën me një prezantim të shkurtër rreth stafit të departamenteve përkatëse dhe zyrave administrative me të cilat do të kenë marrëdhënie të vazhdueshme gjatë kohës së studimeve.
Të pranishëm në këtë takim dhe pjesë e përshëndetjeve të studentëve, ishin Rektori i Kolegjit Universitar Bedër, Prof. Dr. Ferdinand Gjana, dekani i fakultetit të Shkencave Humane Prof. Asoc. Dr. Rahim Ombashi, përgjegjësi i departamentit të Shkencave të Komunikimit Dr. Erlis Çela, pedagogë dhe stafi administrativ nga Departamenti i Drejtësisë dhe Komunikimit.
Takimi vazhdoi më tej me një koktej të organizuar në ambjentin e biblitekës, nën një atmosferë miqësore mes studentëve dhe pedagogëve.
Në kuadër të ciklit “Brownbag Seminars”, z. Lavdrim Lita, përfaqësues i shoqërisë civile,ishte i ftuar nga klubi studentor “Bedër Law Academy” në një leksion të hapur ku ndau me studentët dhe të pranishmit pikëpamjet rreth temës “Impakti i reformave në drejtësi”.
Gjatë bashkëbisedimit, Z. Lita bëri një analizë të përgjithshme të evolucionit historik të sistemit të drejtësisë në Shqipëri, duke filluar që nga viti 1912 e deri në ditët e sotme. Ai u ndal vecanërisht në shpjegimin e periudhave në të cilat janë implementuar reformat në drejtësi duke trajtuar edhe risitë që kanë sjellë në organizimin dhe funksionimin e shtetit shqiptar.
Ndër të tjera, ai theksoi rëndësinë e madhe që ka reforma në drejtësi në aspektin politik, ekonomik dhe social. Krahas kësaj, ai evidentoi dhe analizoi edhe rolin e madh që ka luajtur dhe do të luajë shoqëria civile në përgatitjen e reformës në drejtësi në vendin tonë si dhe në implementimin e saj.
Aktiviteti vazhdoi më tej me pyetje të shumta nga studentët dhe të pranishmit në lidhje me impaktin që ka patur refoma në drejtësi në sfera të ndryshme të jetës.